Հարգելի՛ բնակիչներ,

 Սույն թվականի մայիսի 28-ին Առաջին լրատվական ալիքի լուրերով հեռարձակվել է Ազատ գետում և Ազատի ջրամբարում 50 000 հատ ծիածանախայտ ֆորելի մանրաձկան բացթողնման աշխատանքների վերաբերյալ տեսանյութ (https://www.facebook.com/watch/?v=732190811246733)։

Ծիածանախայտ ֆորելի (Parasalmo mykiss) hայրենիքը Հյուսիսային Ամերիկայի գետերն ու լճերն են: Հայաստան է ներմուծվել 1960-ական թվականներին՝ ձկնաբուծության նպատակով։

 Ազատ գետում ծիածանախայտ ֆորելի հայտնվելն ու տարածվելը հնարավոր բացասական ազդեցություն կարող է ունենալ «Խոսրովի անտառ» պետական արգելոցում հանդիպող ձկնատեսակների և բնական էկոլոգիական հավասարակշռության վրա։

Համաձայն «Կենդանական աշխարհի մասին» օրենքի 19-րդ հոդվածի՝ արգելվում է կենդանական տեսակների ապօրինի ներմուծումը Հայաստանի Հանրապետություն, տեղափոխումը այլ ապրելավայր, կլիմայավարժեցումը և սելեկցիոն նպատակներով օգտագործումը։

Խնդրում ենք՝ զերծ մնալ նմանատիպ միջոցառումների իրականացումից՝ առանց կենդանական աշխարհի պահպանության, պաշտպանության, վերարտադրության և օգտագործման բնագավառներում Հայաստանի Հանրապետության կառավարության լիազորված պետական մարմնի թույլտվության։